قصة رجيم الجزء الاول كتير بسأل نفسي هل البشر ليهم قدره في اذيه
الجن؟ الاجابه من المواقف الي عشناها اه طبعاً بس للأسف الاذيه دي مش بتمر مرور الكرام وبتكون نتيجتها انك بتفتح علي نفسك باب من ابواب جهنم…. وزي ما انت بترد الاذيه لغيرك كمان الجن بيردلك الاذيه لكن الاختلاف انها اذيه لا نهايه لها
……
قولي ورايا يبنتي اعوذ بالله من همزات الشياطين واعوذ بك ربي ان يحضرون… مش قادره في صوت صراخ في وداني مش قادره اتحمله…. حاولي متسمعيش ده بيحاول يشتتك قولي… لكن فجأه الشيخ نفسه بدأ يتخنق واترفع من علي الارض واتهبد بقوه… جريت عشان افتح الباب لكن من العدم ظهر قدامي عينيه في عينيا وقلي رجيم رجييييم
…..
يمكن سمعت كتير قصص رعب لكن صدقني الي هحكيه دلوقتي حصل معايا ممكن الي هيسمع مش هيصدق وهيقول عليا مجنونه لكن انا عشت كل الاحداث دي وما زلت بعيش فيها… انا اسمي حنان عندي 32سنه انا ارمله جوزي متوفي من 3سنين في حادث سير عندي بنت وحيده اسمها جميله وعايشه مع حماتي في شقه جوزي… بصراحه مقدرتش اسيبها لوحدها بعد وفاه ابنها وكمان لانها روحها في بنتي جميله مقدرتش احرمها منها… وهي بصراحه بتعاملني كويس جدا…. القصه بتبدأ من يوم كنت بحضر الغدا وفضل شويه زيت سخن اخدتهم ودلقتهم في الحمام.. انا عارفه ان ده غلط لكن محصلش حاجه اتغديت انا وحماتي وبنتي وطلبت من حماتي اني عاوزه ازور اهلي… قلتلي وماله يا بنتي خدي جميله وروحي زوريهم…. قومت من علي الغدا ودخلت اخد دش…. دخلت وشغلت الدش نور الحمام طفي.. قولت اكيد النور قطع لكن لما بصيت تحت الباب كان فيه نور جاي من الصاله معني كده ان نور الحمام فاصل بس… حسيت بحاجه لزجه بتنزل علي وشي حطيت ايدي على وشي وانا بترعش ورغم اني في الضلمه قدرت اشوف ده دم ايوه دم صرخت وفي اللحظة دي النور رجع بحط ايدي علي وشي مفيش حاجه ولقيت باب الحمام بيخبط كانت حماتي وبتقولي مالك يا بنتي في اي افتحي الباب… لبست هدومي بسرعه وخرجت من الحمام بتنفض ومرعوبه مش معقول الي شوفته ده يكون حقيقه… هديت مكنتش قادره اخرج بعد الي حصل معايا ده… قولت لحماتي انا هدخل انام شويه ودخلت نمت فعلاً صحيت علي ضربه علي ضهري قومت منها بصرخ كنت حاسه ان ضهري اتكسر مش عارفه اتحرك عاوزه اتكلم او انادي علي حماتي لكن صوتي مش بيخرج بفتح بوقي لكن صوتي مش عايز يخرج وسمعت صوت بيقولي انتي عارفه انتي عملتي اي…. اخيرا قدرت اتكلم وقولتله انت مين.. مين الي بيتكلم… مفيش حد رد عليا… قومت وانا لسه حاسه بألم في ضهري مش قادره استحمل…. بصيت في الساعه كانت 8الصبح انا نمت كل ده ازاي…. قررت اني هروح ازور اهلي صحيت بنتي ولبستها وصحيت حماتي وقولتلها انا هروح دلوقتي في الوقت البدري عشان ارجع بدري… قلتلي ماشي يبنتي زي ما تحبي.. اخدت جميلة ورحت زورت اهلي خبطت علي الباب فتحتلي امي سلمت عليها وقلتلي مالك يا حنان… بدأت احكيلها كل حاجه حصلت معايا… قلتلي طيب يبنتي يمكن تكوني بتتخيلي او بيتهيألك… كشفت ضهري عشان امي تشوف مكان الضربه قلتلي مفيش حاجه في ضهرك…. استهدي بالله كده وصلي واقري قرآن وهتبقي كويسه… دخلت ونمت شويه في اوضه امي رحت في النوم بسرعه… صحيت علي صوت غريب بينادي عليا لما فتحت مكنتش علي سريري انا كنت في الحمام واقفه قدام المرايا وفي انعكاس المرايا مش صورتي لا في انعكاس المرايا كان واقف مخلوق كان شكله غريب عنده اكتر من اربع عيون في وشه وعلي جبينه مثلث مقلوب… وقلي قتلتي ابني ليه.. لييييه وفجأه المرايا اتكسرت وبقي واقف قدامي شكله مخيف مفزع…. صحيت من النوم علي صوت امي بتقولي فوقي يبنتي… اترميت في حضنها وفضلت اعيط… قلتلي متخفيش يبنتي كل حاجه وليها حل… الساعه كانت 3العصر قررت اخد بنتي وارجع البيت وقولت لامي انا هحكي لحماتي كل حاجه لازم تعرف…. قلتلي براحتك يبنتي بس انا من رأيي تصبري شويه… اقولك حاجه تعالي معايا هنروح لواحده جارتنا اسمها سيده بتفهم في الكلام ده وجايز يكون عندها الحل… وافقت منا معنديش حل تاني لبسنا وروحنا للست سيده والي عرفته عنها انها بتقري الفنجان خبطنا علي الباب وفتحت لينا ست في الخمسين من عمرها رحبت بينا وقعدنا وبدأت احكي كل حاجه حصلت لحد الكابوس الي شوفته… قلتلي غمضي عينيكي ومسكت قلم احمر وبدأت تكتب علي ايديا وعلي جبيني كلام مش مفهوم واشكال وبعدها فضلت تتمتم بكلام غريب وهي مغمضه وبعدها قالت انتي غبيه انتي اذيتي ابن من ابناء الجان ودلوقتي عاوزين ينتقموا منك… امي ردت وقالت والحل يا ست سيده.. فاتوا عليا بكره وان شاءلله خير…. مشيت انا وامي من عندها ورجعت اخدت بنتي ورجعت لحماتي…. اول ما دخلت الشقه قالت هو ده الي مش هتتأخري… قولتلها بعد اذنك عاوزه اتكلم معاكي ضروري في موضوع مهم..دخلنا الاوضه عندها… وبدأت احكي احكي وبعد ما خلصت بصتلي بسخريه وقالت اه ودي بقا لعبه من والدتك جديده صح… قولتلها لعبه اي… قلتلي انتي جيلك عريس فألفتي الحوار ده عشان اسبلك الشقه واخاف وبعدها تتجوزي مش كده…. اي الي حضرتك بتقوليه ده… قلتلي ده الي انا متاكده منه بس بعينك مش هسيبك تتجوزي وتبعدي حفيدتي عني انا داخله اخد دش قال جن قال وخدت هدومها ودخلت الحمام مفيش دقيقة وسمعتها بتصرخ خرجت اجري من الاوضه وكانت الصدمه…
لقيت حماتي واقعه قدام الحمام ومغمي عليها، جريت نحيتها بحاول افوقها فاقت وفضلت تبكي… وتتنفض قولتلها حصل اي… قلتلي وانا داخله الحمام حسيت بضربه علي ضهري كانت ضربه لا يمكن تكون دي ايد بني ادم انتي عندك حق البيت بقا في حاجه مش طبيعية فعلا…. طيب والعمل هنتصرف ازاي دلوقتي.. مش عارفه…. انا بكره هروح لسيده دي تاني يمكن يكون عندها الحل.. دخلت حماتي واخدت دش وانا قعدت قدام التليفزيون شويه حسيت برغبة ملحه في النوم مش قادره اقاوم لدرجه اني نمت في مكاني…. صحيت لقيت نفسي واقفه في مكان واسع كل حاجه فيه مبنيه من الصخر وقدامي ممر طويل مشيت فيه من غير ما ااحس لقيت نفسي ماشيه فيه لحد لما ظهر قدامي نفس المخلوق الي شوفته قبل كده وقلي انتي عارفه انتي عملتي اي انتي قتلتي وريث العهد… رديت عليه وقولتله انا مقتلتش حد وبعدين انا فين… قلي لا قتلتيه الزيت المغلي الي موته الي رمتيه في بيتنا…. قولتله زيت مغلي اي انا مش فاهمه حاجه… قلي هوريكي حاجه تعرفك حجمكم يا بشر ومشي ومشيت وراه في الممر مسلوبه الاراده لحد ما وصلنا لسلم كبير نزلنا واتفتح باب كان بيطل علي حفره من حفر جهنم عباره عن بركان بيغلي وجواه مئات من البني ادمين كلهم بيحاولوا يخرجوا لكن بمجرد ما بيحاولوا يخرجوا بيوقعوا جوه النار…. قلي شايفه كل دول بشر تعدوا حدودهم زيك كده ودي كانت نهايتهم…. انا معملتش حاجه معملتش حاجه…. اصحي يا حنان فتحت عينيا لقيت حماتي قدامي وانا كنت نايمه قدام التلفزيون… قلتلي اه راحت عليكي نومه… قولتلها انا هدخل اكمل نوم في الاوضه.. ماشي يبنتي… دخلت الاوضه حطيت راسي علي المخده ورحت في النوم من تاني صحيت كان جو الاوضه برد جدا رغم اننا في شهر 7 يعني الدنيا حر جدا لكن معرفش مصدر البرد جاي منين… قومت وخرجت من الاوضه.. نور المطبخ شغال ياتري حماتي صاحيه دلوقتي ليه.. دخلت المطبخ لقيت حماتي واقفه قدام عين البوتجاز وحاطه زيت علي النار وشكلها هتقلي بطاطس او حاجه…. انتي صاحيه دلوقتي اكيد جعانه.. اتلفتت وبصتلي… اعوذ بالله من الشيطان الرجيم اعوذ بالله من الشيطان الرجيم… مكان عينيها كان عباره عن تجويف فاضي…. رجعت لورا وانا خايفه وبترعش اتكعبلت ووقعت علي ضهري…. وفي الوقت ده صوت اذان الفجر كان النجده… قومت وجريت علي اوضتي استخبيت تحت الغطا زي العيال…. منمتش لحد الصبح واول حاجه عملتها اخدت بنتي ورحت عند امي بس المره دي عشان اروح لسيده… اخدت بنتي ورحت فعلا عند امي سبت عندها جميله ورحت لسيده… اول ما فتحتلي الباب كانت بتبصلي بحسره.. قولتلها في اي يا ست سيده.. قلتلي انتي دخلتي نفسك في دايره كبيره انتي مش قدها… طيب والحل اي.. انا للاسف مش هقدر اساعدك بس ممكن ادلك علي الي يقدر يساعدك… طيب ربنا يخليكي يارب وانا مش هدلق اي حاجه تاني في الحمام…. المشكله ان الي مات ده كان وريث العهد يعني كان هيكون ملك وده طبعا مخلي عشيره الجن كلها عاوزه تنتقم منك.. ده عنوان الشيخ طه شيخ مبروك وليه كرامات وممكن يقدر يساعدك… كتر خيرك انا مش عارفه اقولك اى…. خرجت من عندها ورحت لامي وحكتلها كل حاجه قلتها سيده.. قلتلي خلاص يبنتي روحيله وان شاءلله خير… لا انتي لازم تيجي معايا انا مش هروح لوحدي… حاضر رجعت بنتي عند حماتي وقولتلها اني هروح مشوار مع ماما وراجعه… ورحت على العنوان كان بيت بسيط جدا في حاره صغيره كنت متوقعة اشوف دجال نصاب لكن بصراحه مفيش الكلام ده كان راجل واضح عليه انه كويس… قلي احكي يبنتي الي بتعاني منه وان شاءلله خير… طلب من امي تطلع بره الاوضه وقلي… قولي ورايا يبنتي اعوذ بالله من همزات الشياطين واعوذ بك ربي ان يحضرون… مش قادره في صوت صراخ في وداني مش قادره اتحمله…. حاولي متسمعيش ده بيحاول يشتتك قولي… لكن فجأه الشيخ نفسه بدأ يتخنق واترفع من علي الارض واتهبد بقوه… جريت عشان افتح الباب لكن من العدم ظهر قدامي عينيه في عينيا وقلي رجيم رجييييم…. ده كان اسمه اغمي عليا من شده الحراره الي كانت خارجه منه… لما فوقت لقيت نفسي علي كنبه صغيره في بيت الشيخ طه وقلي… الي عليكي اسمه رجيم ده جن موكل بالخراب والدمار والقتل وهو يبقي ابن ملك من ملوك الجن السبعه للاسف الموضوع مش سهل بس ان شاءلله ربنا يسهل ونقدر نحله روحي دلوقتي وصلي وخير اطمني… رجعت البيت فاقده الامل في كل حاجه حاسه اني هموت.. دخلت اوضتي وحماتي كانت نايمه هيا وبنتي… بمجرد ما دخلت لقيت شخص قاعد علي كرسي في الاوضه شخص عادي انسان جيت اصرخ عشان اقول حرامي لساني اتلجم والباب اتقفل لوحده… قام من مكانه وهو بيقولي يعني يوم ما اظهرلك بشكل بشري هتخافي مني… قولتله انت مين ودخلت هنا ازاي…. قلي انا.. انتي مش الشيخ طه قالك اسمي…. رجيم… ضحك ايوه رجيم انا جاي اعرض عليكي عرض صغير لو وافقتي عليه هنسي كل الي عملتيه وترجعي لحياتك ولو رفضتيه يبقي انتي الي اخترتي… عرض اي… انا اخترتك عشان تكون زوجتي انا حبيتك واخترتك ورغم العقاب الي انا هنوله لكن انا مستعد اضحي…. قولتله لا مش ممكن انا انا اتجوزك انت اتجوز جن ده لا يمكن ابدا… في لحظه بقي واقف في وشي هتوافقي يا حنان معندكيش اختيارات… لا لا مش موافقه.. عينيه اتقلبت وبقيوا اشبه بجمرتين من جهنم وقلي بكره هتدفعي تمن اختيارك…. فضلت اعيط واقول يارب انقذني من الي انا فيه… فتحت باب الاوضه لقيت حماتي خارجه من اوضتها وبتقولي حمدالله علي السلامه انا هدخل اخد دش وبعدها نتكلم.. دخلت تاخد دش لكن فجأه سمعت صوت صرخه هزت البيت.. خرجت اجري من اوضتي وكانت الصدمه…. يتبع الجزء الثاني
#رجيم
الجزء الثاني والاخير
الحمام… الحمام بيتحرق وحماتي جوه بتصرخ جريت علي الباب وفضلت اخبط… واصرخ افتحي الباب افتحي…. الباب اتفتح لوحده بعد محاولات.. وفي اللحظه دي كانت الجيران كسرت باب الشقه ودخلوا علي منظر اقل ما يقال عنه منظر بشع منظر لا يمكن يروح عن بالي ابدا…الحمام عباره عن بركه دم كبيرة وجواها جثه متفحمه… جثه حماتي… الناس فضلت تقول لا إله إلا الله اما انا فأصبت بنوع من الخرس واغمي عليا… معرفش قد اي لكني لما فوقت لقيت نفسي في مستشفى… مكنتش عارفه اتكلم وعرفت اني مصابه بصدمه عصبيه حاده وان حالتي النفسية مش مستقره واني بقوم من النوم واصرخ واخترف… وعرفت كمان اني فاقده الوعي ليا اسبوع… كنت ببكي كل ما افتكر منظرها وهي ميته…..فات شهر وانا عايشه في المستشفى كان شهر هادي مفهوش اي حاجه كنت فاقده النطق اي حاجه عاوزاها بطلبها اني بمسك ورقه وبكتب عليها الي عاوزه… وبعد مرور الشهر اتكتبلي علي خروج كان مستحيل ارجع للبيت ده تاني… رجعت علي بيت اهلي لقيت امي وبنتي الي مليش غيرها دلوقتي… لكن كان لازم ارجع عشان اجيب هدومي من الشقه..رجعت واخدت هدومي عشان مكدبش محصلش حاجه وامي جات معايا عشان تطمني… لميت هدومي وحاجتي كلها ومشيت رجعت تاني بيت امي… جات في اليوم ده سيده تزورنا مكنتش متقبله الزيارة خصوصا في الوضع الي انا فيه لكن في الاخر دي ضيفه مقدرش احرجها… لاحظت انها طول ما قاعده بتحرك بوقها وبتقول حاجه بس انا مش قادره اسمع وبتبص في كل ركن من اركان الشقه وبعدها قلتلي هو لسه حوليكي مش هيسيبك… امي قلتلها هو مين… ردت عليها بنتك فاهمه حصنيها كويس وربنا يسترها عليكي…. وقامت ومشيت بعد الكلام ده.. كنت قلقانه وخايفه من كلامها وعدي اليوم ودخلت انام لكني حلمت اني واقفه في مكان ضلمه عتمه مش شايفه اي حاجه لكن كنت سامعه صوت بيقولي هتوافقي معندكيش اختيارات ارضي احسن مايكون غصب عنك…. في الحلم كنت قادره اتكلم وقولتله لا مش هتجوزك مش هتجوزك… ظهر قدامي وشه في وشي نفسه مقرف حسيت بحراره بتحرق وشي وقلي قولتلك مش باختيارك وحط ايده علي دماغي وقال اهياش ماقر تخليشن ظاهر فضل يعيد في الجمله دي كتير حسيت اني بفقد السيطرة علي نفسي وقعت في الأرض وانا بكح وباخد نفسي بالعافيه وبدأ المكان من حواليا ينور عشان الاقي نفسي في قبر ايوه قبر… كنت عاوزه اقول اي حاجه لكن هو الي اتكلم وقال انتي الان زوجتي سيكون العهد الجديد منك سيصبح ملك عشيرتي…. صحيت من النوم علي صوت بنتي بتعيط… قومت حاسه جسمي كله متكسر بصيت علي بنتي الي كانت كويسه الحمدلله مفيش حاجه… حسيت اني مخنوقه طلعت المصحف عشان اقري فيه شويه لكن باب البلكونة اتفتح بعنف زي ما تكون عاصفه وهبت قفلت المصحف ورحت عشان اقفل باب البلكونة.. لكن في البلكونة كان فيه حد واقف ومديني ضهره كنت خايفه وبترعش.. كان الخيال ده لواحده ست واتلفتت وبصتلي كانت حماتي حماتي بشكلها المشوه وقلتلي بصوت مبحوح متقريش قرآن متقريش قرآن…. رجعت لورا وباب البلكونة اتقفل واترزع لوحده كنت مرعوبه من الي بيحصل وفضلت اعيط امي صحيت لقتني قاعده علي الأرض وبعيط اخدتني في حضنها وفضلت تهدي فيا… نفسي اتكلم لكن مش عارفه…. تاني يوم طلبت من امي اني عاوزه ازور قبر جوزي الله يرحمه… وافقت وقلتلي وانا هاجي معاكي ورحنا فعلا وقفت قدام قبره وفضلت اعيط جيت اقراله الفاتحه لقيت فيه تشويش في دماغي مش قادره افتكر الفاتحه انتوا متخيلين بصيت لامي واتصدمت لانه كان واقف وراها وبمجرد ما امي قالت
بسم الله الرحمن الرحيم.. لقيت لسان امي بيتعوج ووقعت علي الارض.. جريت عليها قومتها كانت بتاخد نفسها بالعافيه وقلتلي يلا نمشي من هنا يلا اخدتني ومشينا رجعنا البيت..امي قلتلي الموضوع كده مش طبيعي احنا لازم نتصرف مكنتش عارفه ارد عليها دخلت نمت من التعب.. حسيت ان في حد بيلمسني وانا نايمه.. فتحت عينيا وبحركه تلقائيه لقيته جمبي… رجعت لورا وانا بترعش ابتسم ابتسامه مرعبه وهو بيقول انتي خايفه مني انتي مراتي دلوقتي خلاص يعني ده وضع طبيعي… لاول مره من فتره حسيت اني قادره اتكلم وقولتله لكن كان الكلام بيخرج مني بالعافيه لا انا مش مراتك انت جن ملعون اعوذ بالله من الشيطان الرجيم.. ملحقتش اكمل الكلمه لقيته في وشي ولقيت نفسي بتخنق وقلي انتي عارفه انا عملت اي عشانك تعرفي اني منعت عيشرتي من الانتقام منك تعرفي اني دلوقتي جن متمرد مطرود من قبيلتي بسببك وفي الاخر بترفضيني لا انا مش هسمح بده ابدا…. سبني ووقعت علي الارض ولقيت امي داخله عليا الاوضه بسرعه ولما لقيتني بتكلم قالت الحمدلله احمدك يارب… قلتلي اسمعي في حد جاي بكره يزورنا وان شاءلله المشكله هتتحل… في اليوم ده معرفتش انام فضلنا صاحيين انا وامي للصبح لحد لما الباب خبط قامت امي وفتحت الباب كان راجل كبير في السن لحيته بيضه شكله تقي فعلا.. دخل البيت وادي امي حاجه لقيت امي بتقرب مني وبتلبسني حاجه في رقبتي كانت سلسله عليها آيه الكرسي… اتكلم الشيخ وقلي انا الشيخ نصر الطيب متخفيش دي بس تحصين وحمايه وعشان محدش منهم يسمع كلامنا احكي كل حاجه وانا بعون الله هساعدك بدأت احكي كل حاجه حصلت… سكت شويه وقلي انا هفسرلك انتي دلقتي زيت سخن في الحمام وده اتسبب في اذيه ملك من ملوك الجن ملك قادم وعهد… الجن الي بيظهر ليكي ده كان حارس العهد ودلوقتي مغضوب عليه من عيشرته عشان معرفش يحمي العهد غرضه انه يتجوزك ويخلف منك عهد جديد عشان يكون ملك لكن متخفيش بعون الله هنقدر ننتنصر عليه… نامي هنا وغمضي عينيكي وعاوزك ترددي كل كلمه بقولها ومهما سمعتي ومهما قولتي رددي الكلام…. اعوذ بالله من همزات الشياطين واعوذ بك ربي ان يحضرون.. اعوذ بكلمات الله التامات من شر ما خلقأعوذ بكلمات الله التامة من كل شيطان وهامة ومن كل عين لامة أعوذ بكلمات الله التامات التي لا يجاوزهن بر ولا فاجر من شر ما خلق وذرأ وبرأ، ومن شر ما ينزل من السماء ومن شر ما يعرج فيها، ومن شر ما ذرأ في الأرض ومن شر ما يخرج منها، ومن شر طوارق الليل والنهار ومن شر كل طارق إلا طارقا يطرق بخير يا رحمان
فضلت اعيد وراه وبدأت اشوفه لكن كان ابشع من اي مره شوفته فيها شكله البشع الي ظهر بيه قرون حمرا عينيه اشبه باللهب وشه متقطع وقلي اسكتي هقتلك وهقتله اسكتي هقتلك بنتك هتموتوا كلكوا.. المشهد اتبدل وشوفت امي بتخنق في الشيخ لحد ما مات كنت هسكت وافتح عينيا لكن في لحظه افتكرت كلام الشيخ اني مسكتش مهما سمعت… قريت آيه الكرسي والمعوذتين.. لقيته جسمه بينكمش وبينحني عضمه بيخرج بره جسمه ومن العدم ظهرت مخلوقات صغيره ورغم صغرها وشها عجوز جدا هجمت على رجيم كانوا بيتباروا في القضاء عليه شوفته بيموت قدامي وبيتحرق وفتحت عينيا.. لقيت الشيخ بيقولي حمدالله علي السلامه حكتله الي شوفته ضحك وقلي الجن بطبعه خداع عموما خلي بالك من نفسك وقربي من ربنا…. انا دلوقتي احسن كانت تجربه صعبه لكن عرفت واتعملت منها كتير دي كانت قصتي حكيتها عشان الناس تتعظ وتقرب من ربنا
…
تمت
….
